Дзень роднай мовы - 2023

 

Прывітанне ўсім, хто знайшоў час зазірнуць на гэтую старонку. З мовай ў мяне непростыя ўзаемазносіны. 

У атэстаце стаіць "не вывучала",  таму, як толькі апошнія два гады вучылася ў Дуброўскай сярэдняй школе (раней больш у расійскай). Але, атрымліваючы прафесійную  адукацыю, чытала тэксты і палюбіла яе. Таксама люблю размаўляць па-беларуску, чытаць вершы, люблю слухаць, калі гэта робяць іншыя. Памылак раблю шмат, але імкнуся выправіць іх. У мяне ёсць любімыя і не любімыя словы.

21 лютага ва ўсім свеце адзначаецца Міжнародны дзень роднай мовы.

Вядомы беларускі пісьменнік Янка Сіпакоў пісаў:

“Толькі праз родную мову чалавек можа стаць беларусам, бо ў ёй хімія і фізіка, гісторыя і батаніка, эканоміка і культура таго, што называецца нацыяй, народам”. 

У гэты дзень уся Беларусь пісала дыктоўку па роднай мове.

Гэта можна было зрабіць анлайн.

У сельскую бібліятэку з нагоды Дня роднай мовы прыйшлі пяцікласнікі на акцыю ў падтрымку роднай мовы "Вывучаю. Ведаю. Гавару".

Сперша мы пагулялі ў словы. Па чарзе  называлі розныя беларускія  словы. Кожнае наступнае слова павінна пачынацца на апошнюю літару папярэдняга. Чамусьці так сталася, што большасць слоў, якія нам патрэбна было назваць, пачыналіся з літар “а”, “і”. Але былі прыгаданы цўдоўныя словы – аблокі, абрус, адліга, абцас, алфавіт, абліваха, ільдзіна, іней, інтэрнэт і іншыя.

Далей паслухалі казку- інсцэніроўку “Кропка над і” Анатоля Кудласевіча.

У ёй расказваецца пра тое, як над літарай “і” з’явілася кропка. Пра ролю ў гэтым літары “Я”, якая знаходзілася апошняй у Алфавіце, але была занадта ганарлівай  і ўсюду любіла быць першай.  Яна пакрыўдзіла літару “і”,  за гэта была пакарана – заўсёды стаяць у канцы.

Потым, падзяліўшыся на дзве каманды, школьнікі выканалі заданні.

 Адна каманда за 6 хвілін пераклала 18 беларускіх слоў на рускую мову, другая – 27.  Цяжкасці (перакладзены з памылкамі) выклікалі словы: люстэрка (не люстра, а зеркало), лёс (не лес, а судьба), ложак (не ложка, а кровать), дыван (не диван, ковёр), жменька (сама чуть вспомнила, горсть). Капітаны атрымалі прызы.

Знайшлі адпаведнікі да фразеалазімаў “з лёгкім сэрцам”, “закручваць гайкі”, “карміць абяцанкамі” і іншых.

Мова - з’ява цікавая, і трэба часцей на ёй размаўляць

21.02.2023. аг. Дуброва, сельская бібліятэка,

бібліятэкар Людміла Фёдараўна Бусел.