Светлыя далі роднага краю: краязнаўства

Выйшаў з друку зборнік фальклорных матэрыялаў “Светлыя далі роднага краю”.  

Мне заўсёды была блізка тэма збору і захавання аўтэнтычнага фальклору. У праект, аб якім пойдзе размова, трапіла зусім выпадкова. Аднавясковец А. П. Цярэшчанка даў мой нумар тэлефона В.С. Новак, якая займалася зборам матэрыялу для кнігі. Валянціна Станіславаўна Новак – прафесар Гомельскага дзяржаўнага універсітэту імя Ф. Скарыны, дактар філалагічных навук. Асабіста я з ёй незнаёма, але чула пра яе. Яна патэлефанавала, спытала, ці ёсць у мяне які-небудзь матэрыял для зборніка, які гатуецца  да выдання. Даслала свой электронны адрас. 

9 кастрычніка ў Светлагорскай раённай бібліятэцы адбылася прэзентацыя кнігі “Светлыя далі роднага краю”, надрукаванай у рэдакцыі газеты “Гомельская праўда”.  

Новак В.Ст.

Пра гэта я даведалася з электроннай версіі раённай газеты “Светлагорскія навіны”, 14 кастрычніка артыкул выйшаў у папяровым выглядзе.

А потым мне сказалі, што мае матэрыялы ўвайшлі ў зборнік.   Але, дзе гэта пабачыць? Высвятлілася, што кнігі ў апрацоўцы і ў хуткім часе паступяць у бібліятэкі раёна.

У тэлефоннай размове Валянціна Станіславаўна папрасіла мяне даслаць ёй спасылкі на артыкулы аб прэзентацыі.

Прафессар расказала, як складана было знайсці сродкі на выданне. Атрымалася гэта не з першага разу. Дзякавала ўсім, хто меў дачыненне да гэтага праекту - работнікам культуры, якія падзяліліся сабраным фальклорным матэрыялам, мясцовай уладзе, якая здолела знайсці фінансаванне.

На прэзентацыі (па службовым абавязкам) прысутнічала мая дачка. Яна калісьці навучалася ў Валянціны Станіславаўны. Калі прафесар пачула пра гэта, сказала: “Мабыць, Ваша дачка была самым зацікаўленным слухачом на прэзентацыі”. Перадала праз мяне ёй самыя цёплыя пажаданні.

Мне таксама былі выказаны самыя шчырыя словы ўдзячнасці і упэўненнасць, што мы зробім сваю цудоўную прэзентацыю…  Спадўзяюся, так і будзе, калі атрымаем кнігу ў бібліятэку.  

І яшчэ адно падобнае выданне мы чакаем. Мінскі інстытут мовазнаўства  планаваў выдаць зборнік. А ў ім вынікі экспедыцыі яго навуковых працаўнікоў, у тым ліку на Светлагоршчыну.

10.11.2025 г. бібліятэкар Людміла Бусел.

аг. Дуброва, Светлагорскі, Гомельская, Беларусь.