Нашы знакамітыя землякі. Ведаць і ганарыцца!

пятница, 14 октября 2016 г.

Нашы знакамітыя землякі. Ведаць і ганарыцца!

Школьнікам аб знакамітых земляках.

Па чацвергах перад заняткамі ў 8:15 у нашай школе праходзіць інфармацыйная гадзіна. 13 кастрычніка яе тэма была “Нашы знакамітыя землякі”. Аб іх распавяла сельскі бібліятэкар Людміла Фёдараўна Бусел. Так здарылася, што 2016 год - юбілейны для ўсіх трох нашых знакамітых землякоў. Бібліятэка выдала буклет, прысвечаны юбілярам.

Невялікая прэзентацыя дапамогла нагляднаму раскрыццю тэмы.

Стогадовы юбілей ў гэтым годзе ў Дайнекі Піліпа Пятровіча (16.11.1916 — 13.02.1979), Героя Сацыялістычнай Працы.

Нарадзіўся Піліп Дайнека ў в. Дуброва. Тут жылі яго бацькі – працаўнікі калгаса “Чырвоная Дуброва”. У 1936 годзе быў прызваны на вайсковую службу, скончыў ваеннае вучылішча.

У гады Вялікай Айчыннай вайны П.П. Дайнека прымаў актыўны ўдзел ў партызанскай барацьбе супраць фашысцкіх захопнікаў на тэрыторыі Беларусі ў якасці палітрука, камісара партызанскага атрада i партызанскай брыгады імя Аляксандра Неўскага, сакратара Гродзенскага падпольнага райкома партыі. Пасля вайны П.П.Дайнека займаў высокія дзяржаўныя і партыйныя пасады. Піліп Пятровіч Дайнека выбіраўся ў састаў Цэнтральнага камітэта Кампартыі Беларусі, быў дэпутатам Вярхоунага Савета БССР. Узнагароджаны двумя ордэнамі Леніна, ордэнамі Чырвонага Сцяга, Айчыннай вайны 1 ступені, "Знак Пашаны" i многімі медалямі. У 1979 годзе яму прысвоена званне Ганаровы грамадзянін горада Масты Гродзенскай вобласці.

80 год споўнілася ў гэтым годзе яшчэ аднаму ураджэнцу в. Дуброва. Бусел Іван Паўлавіч нарадзіўся 21 мая 1936 года. Ён кандыдат сельскагаспадарчых навук, дацэнт кафэдры эканомікі і арганізацыі сельскагаспадарчай вытворчасці, аўтар больш за 100 навуковых і навукова-метадычных прац, аўтар і сааўтар некалькіх кніг, па якіх займаюцца студэнты і якімі карыстаюцца аграрыі-практыкі. Жыве ў Мінску.

Таксама 80 год адзначыў у гэтым годзе Бусел Яўген Сямёнавіч. Нарадзіўся ён 14 лютага 1936 года ў суседняй вёсцы Міхайлаўка — член Саюза мастакоў СССР і Беларусі, удзельнік шматлікіх міжнародных і рэспубліканскіх мастацкіх выставак, на якіх яго працы атрымлівалі высокую ацэнку, шмат гадоў быў аўтарам і членам рэдкалегіі часопіса “Вожык”, заслужаны дзеяч культуры Рэспублікі Беларусь.

Таленавітаму мастаку блізкія па духу беларускі фальклор, народны лубок, прывабліваюць тэмы жанчыны і сям’і. Усё гэта ён адлюстроўвае ў сваёй разнастайнай творчасці. Прыказкі і прымаўкі, якія мастак адлюстраваў пзндзелем: Ой, ляцелі гусі з сіняга Дунаю…А чаму ты не прышоў, калі месяц узышоў?...Цвіла ружа ў агародзе… Пры сонейку цёпла, пры мамцы добра… Маладзіцы, як брусніцы.. Быў час — калі дзеўкі любілі нас.. Пчолка рада квету, а чалавек — лету…Лепшая вадзіца з роднай крыніцы… Садок садзіць — жыццё харашыць.. А я роду не такога, каб любіць абы якога… Вясновы дзень год корміць… Увосень у ўгосці просім… Хто скуль, а мы тутэйшыя… Сядзем у рад — тата будзе рад…. Няма тое крамы, каб прадаваліся мамы….Татава хата ўсім багата.. .

Ў 2013 годзе Бусел Яўген Сямёнавіч перадаў у дар музею гісторыі вёскі Дуброва брашюры са сваімі карыкатурамі і чатыры свае карціны: “…Цвіла ружа ў агародзе…” , “Пчолка рада квету, а чалавек лету”, “Тут і я, тут і жонка мая, тут і мае дзеці — люба паглядзеці”, “Лепшая вадзіца з роднае крыніцы”. Жыве мастак у Мінску.

Падтрымліваем зносіны з гэтымі выдатнымі людзьмі родам з нашай мясцовасці.

Школьнікам былі паказаны энцыклапедыі і даведнікі, у якіх ёсць артыкулы аб нашых знакамітых земляках. Трэба іх ведаць і ганарыцца імі. Вучыцеся і праслаўляйце сваю радзіму, сваю вёску, сваю школу!